Балаларымыз бақытты болсын!

Макинск қаласының орталық алаңында барлық балалардың тағатсыздана күтетін сүйікті

мейрамы – Халықаралық балаларды қорғау күні атап өтіліп, мерекелік іс-шараға

қаламыздың кішкентай тұрғындарының басым көпшілігі қатысты.

Жаздың алғашқы күні ауа-райы ерекше нұрланып, бүлдіршіндерге және алаңға жиналған

үлкендер қауымына да көтеріңкі көңіл күй сыйлағаны сөзсіз.

Балалардың басты мерекесі салтанатты парадтан басталды. Әдеміленіп киінген мектеп

оқушылары мен балабақшалардың тәрбиенушілері қолына түрлі-түсті шарлар мен

жолақтарды алып мерекелік сахнаның алдынан өтті. Ал әрі қарай нағыз қызық

басталды. Аудандық білім беру, мәдениет және тілдерді дамыту және спорт

бөлімдері дайындаған тамаша мерекелік бағдарлама басталып кетті. Балалар

шығармашылық ұжымдарының ән мен биге ұласқан театрландырылған көріністерін

тамашалап, әсерлі флеш-мобта бірлесе билеп, аудандық Мәдениет үйінің ішінде

плакаттарға сурет салып, мектепке дейінгі балалар арасындағы веложарыста өз

бақтарын сынады. Әрине, ас адамның арқауы, сондықтан орталық алаңда тәттілер

мен балмұздақтар сатылып, балалар қалағанын алып тағы бір қуанды.

Аудан басшысының атынан балаларды керемет мейрамымен — Халықаралық балаларды қорғау

күнімен аудандық мәслихаттың хатшысы Шахман Құсайынов құттықтап, балаларға зор

денсаулық, оқуда табыс, ашық аспан мен жазғы демалысты ойдағыдай өткізуді

тіледі.

Әрине, қандай да болмасын іс-шараны ұйымдастыру оңай емес, сондықтан осы мерекені

басынан аяғына дейін ұйымдастырып, балаларға үлкен қуаныш сыйлай берген және

осы мерекеге қатысты қаржылай көмек көрсеткен жомарт кісілерге зор алғыс айту

өте орынды. Себебі, демеушілердің қолдауыының арқасында балаларға тегін

балмұздақ таратылып, сайыстарда жеңімпаз атанған бүлдіршіндерге естелік

сыйлықтар табыс етілді.